開壇緣起

是咁的。話說已經多年無接觸過blog。記得十年前寫blog作為一種玩意初興之時,亦曾經玩票性質開過抒情為主既blog。斯時年輕而少經風浪, 所寫的不過係強說愁既少年情懷,又或係對時局之管窺蠡測。時光荏苒,十年間齒髮漸長,當日寫blog作為流行玩意不再,今日少人講寫blog,現實既香港 人紛紛開個好使好用既微博,更加多係用facebook update status,影住杯Starbucks 咖啡加句「味.咖啡」算數。

十年以來,人生經歷漸長,對時局同事物既睇法大有不同,正如呢個城巿從當年既表面睇起來一切無變到今日敗象漸呈,亦不過十年時間。將近而立之年,面對現實既衝擊已然吃力,有事業家庭要兼顧,而呢一刻我居然對住Microsoft Word打字!莫非中年危機提早來臨?

無他,雖係而立之年,仍對世事睇唔過眼。少年時代既熱血仍在。《Jump》之三寶︰友情、熱血、勝利,可能就係後生果陣浪費無數個小時睇漫畫既最大得著。而好似《銀魂》既長谷川泰三一樣,最後我無可避免地成為一個大叔,一個熱血既大叔。

言歸正傳,點解成三十歲人先再寫blog?學少年漫畫話齋,人生就係不停既戰鬥。而我呢個大叔唔似得高登仔身懷絕技,我既戰鬥工具就只有手上既一枝筆 ―― Sorry,係鍵盤先啱。一個熱血既鍵盤戰士大叔。

弊, 越講越離題。查實呢個blog想講D乜?呢個blog叫做「協紀辨方」。有玩過下術數既巴絲打或者會聽過。簡單黎講,就係一本教人擇吉擇日既書。協紀者, 協調人同天地之間既關係,辨方者,選擇分辨有利既方位行事。而要做到協紀辨方,就先要搞清楚自己係天地宇宙間既位置。比如我呢個大叔黎講,就係處於香港呢 個地方既一名地球人,行年三十。家裡我係一個老公,返工我係公司職員,係老豆老母既孝順仔,最重要係,出生於香港最美好年代既純正香港人。

點 解要協紀辨方?一個唔知自己處境,唔知自己位置既人做事就會進退失據,又或者鍾意自己作D令自己好過既理由呃自己,最終迷失自我,終日活係謊言之中。到最 後我想講既無非係「人貴自知」,「活在真實中」(Live in Truth)。呢個地方依家群魔亂舞既原因,就係太多人連自己係咩人都唔知,連自己身處咩處境亦唔知,所以行事說話一係矯情造作虛偽(譬如話要包容大陸人 既左膠),一係proud of「我不懂政治!」(按︰呢句話個!係精髓,一定唔可以漏),當然為一己私利,鼠目寸光既亦不在少數。大叔身為出生於香港最美好既年代既純正香港人,真 係睇唔過眼。令到每個香港人知道自己係咩人,對自己有自信,肯定自己既存在價值,係我呢個大叔開呢個blog既原因。

ab

當然,到最後或者都係我呢個大叔自說自話啫。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s