男人到左三十歲仲要依賴地鐵好可憐

是咁的,我係一個三十歲既港男,一個同你同佢一樣,每日都要搭地鐵返工放工出街送條女番屋企既普通男人。曾幾何時,我覺得出街搭地鐵,搭巴士無乜大不了,香港交通咁方便,使乜好似外國咁揸車?所以我連車都無學。

曾經有一年,有個女明星受訪時講過一句「坐公共交通工具好危險」,引來網民口誅筆伐。後來句野傳下傳下,變左「我覺得男人到左三十歲仲要依賴交通工具好可憐」,成為香港網絡史上既假膠金句。當年我係其中一個有份回覆既真心膠。

但係呢一刻,諗番起呢句野,我係完全笑唔出。身處係港鐵既車廂內,我真心覺得自己好可憐。

「由於訊號故障,來往紅磡至羅湖既列車服務將受阻…二十二…分鐘,不便之處,敬請原諒。」我唔知道果把送殯咁既廣播聲不斷重複「不便之處,敬請原諒」究竟係真心向乘客致歉,定係特登去撩起搭客既怒火。

仲有,點解永遠係得條路軌既訊號會壞,又唔見車廂入面開到鬼殺咁嘈果部電視會壞既呢?

「有無搞錯呀,又壞」「價你就識加,車就日日壞」「仆街啦,一個月遲幾鑊,咁搞法實比老細炒」既咒罵聲此起彼落,同時車廂入面既人紛紛致電公司同客人通知 自己會遲到。朝早既車廂已經多人,班次一旦延誤,就造成惡性循環。月台上早已逼滿乘客,一副副憤怒又無可奈何的表情。望住黑壓壓既人群,我已經分唔清呢架 火車,究竟係用黎運豬定係運人。

我唔知道地鐵火車幾時開始變成咁。記得細細個坐火車係一件好興奮既事。望住車外既鄉郊風光,好有去戶外旅行既感覺。每次向車廂外望明媚風光,都不期然哼著Beyond既《早班火車》。如今,俱往矣。

響我有限既記憶裡面,就算去到果位女明星講話「坐公共交通工具好危險」果年,個情況都未去到咁壞。以前訊號故障係三年唔逢一閏既事。而家你每日出門之前, 最好開一開港鐵個apps睇清楚交通狀況先好上車。甚至從來唔信神唔信佛既我,由唔知幾時開始,養成左響個心度向上天祈求既習慣,祈求今日地鐵生生性性, 唔好壞車。

今日係條女阿怡既大學畢業典禮日。呢一刻,我好清楚知道,無論點樣,我都係無可能趕得切。

「得啦,咁你以後都唔駛黎啦」阿怡冷冷的道。意料之內既答案。阿怡曾經再三勸我學車,買番部錢七代步。我無聽。呢一刻,我好後悔,同時亦覺得自己好可憐。我唔單止因為無聽阿怡講去買車學車而後悔,我亦都後悔點解當日走去恥笑果位女明星,果句假膠金句。

幾多人既感情,幾多人既家庭,幾多人份工既命運,就係維繫響一條鐵路上面。一個男人到左三十歲仲要依賴地鐵,確實好可憐。因為佢已經將自己既命運,押注係日日故障既交通工具上面。要我將自己既人生押注係錢果豐身上,我倒不如將身家性命押係貌似林雪既紅van司機身上。

再等落去都無意思,我索性落左車,出左閘,係水貨賊既車仔同大篋熙來攘往既車站外,點起了煙。望住灰矇矇既煙圈,我望唔透,我望唔清究竟呢個世界仲有幾多野我係掌握到。

見到前面路口有架紅van呼嘯而來,我下意識地招了招手,上了車。我甚至無理會到呢架紅van究竟駛去邊度。係呢一刻,我覺得自己係一個浪子。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s