幾時連學風水命理都變咗反共?

睇黎好多人無諗過,學風水術數,分分鐘變成反共反黨。

中共主席習近平近日聲稱要整頓大陸官場怪力亂神的歪風,風水運程書在重點打壓之列,香港出版的命理運程書在大陸被禁止出版。臨近農曆新年,本來係一眾風水師傅大賺版稅過肥年既季節。豈料埋到口既肥肉就因為習總一道禁令,頓時見財化水,利字當頭,連蘇民峰呢挺世界仔,都忍唔住向《蘋果》記者吐苦水︰「咁都禁,(爭取普選)唔使諗啦」。去政治化,從來唔係你想得咁容易。

so man fung

咩時候係統一戰綫,咩時候係反對中國共產黨的領導地位,當然係黨說了算。共產黨講既,係唯物辯證法,正反合,矛盾統一,黨既思維,係非常靈活,你絕對估佢唔到。孫悟空最多七十二變,共產黨可以千變萬變,比千手觀音如來佛祖更厲害。中共前前任Boss江澤民經常燒香拜佛,尚且係馬列毛忠實信徒﹔今朝習總欲效法老毛故事,掃除一切牛鬼蛇神,當然也是共產主義的忠實傳人了。蘇師傅或者精通風水命理,但似乎唔知道,風水術數,從來都係好政治化。其中的政治意義,當然唔止蘇師傅一個「咁」字了得。

術數命理,在古代中國獨尊儒術的環境下,長期被斥為不入流的小道小術,聖人的義理才是王道。《易經》雖為五經之首,在儒學家的意識型態壟斷下,長期以義理釋經,觀象玩占只係士大夫的業餘愛好。況且今日各門術數雖然自稱源自《易經》,認親認戚,其實多門術數同《易經》關係不明顯,反而跟道家在玄理上,以及跟陰陽家的五行學說,和兵家的應用上,似更有淵源。

人人雖然口裡說不,身體相當誠實,是亙古不變的真理。歷代芸芸帝皇,深信命理玄學的不在小數︰漢文帝向賈誼不問蒼生問鬼神,唐太宗命李淳風袁天罡二人撰《推背圖》,宋仁宗以六壬為嗜好,到近代好事者吹噓毛太祖以奇門遁甲術打敗蔣介石取得政權,術數,從來同政治密不可分。幫助帝皇建朝立業的軍師,本身不少都精通術數。歷朝歷代均設司天台、欽天監等職位,專門做占星擇日研究,為帝皇提供玄學方面的專業意見。擇個吉日祭祀出兵,選太子選妃嬪揀個好八字,造陵墓最緊要保我朝千秋萬代。難怪風水術數之書,在眾多朝代裡面屬禁書。很多預測術或風水著作都深藏大內皇宮圖書館,每當朝代更迭遭逢戰亂,才有風水命理著作流落民間。《舊唐書.方伎傳序》:「聖王禁星緯之書,良有以也。」隋唐以降至明清,律例載明,私藏天文圖讖者可遭處刑。可見玄學命理,係被官方用作維穩之術。

陰陽讖諱既然用得黎維穩,當然亦用得黎謀反。其中五德終始說,就常被用來解釋朝代之間的興替。本來朝代與朝代係採用相克說,不過理論梗係用黎遷就現實架啦,正如龍門梗係用黎搬一樣道理。王莽篡漢之後,為支持自己政權的合法性,變成五行相生說。此後龍門一直隨著勝利者的喜好不斷飄移。風水玄學背後的邏輯,很大程度上是基於天人感應說,外部世界的現象和變動與人的吉凶休咎有關,係上天對人命運的提示。於是民間每逢起事前,人為地製造改朝換代的徵兆,幾乎係必備既動作。最有名的,就是元末韓山童的「石人一隻眼 挑動黃河天下反」,編成民謠,四處流傳,最終元亡明興。

 five elements

地獄鬼國陷於赤共以來,一度以馬列毛為神祇,神祇的真面目被揭穿後,舉國眾生失去了宗教精神支柱。精神上的空虛,有錢都撫不平。眼前無路,又只好回頭向過去尋求。於是鬼國上下居然又再度燒香拜佛,測字扶乩起來,各類「易學大師」、「盲派大師」也就各顯神通,粉墨登場。法輪功也是趁這種信仰真空狀態而廣收信徒,壯大教派,只係聲勢太壯,導致槍打出頭鳥,成為中共頭號打擊對象。

共產黨畢竟係熟讀歷史的,知道神秘學鼓動人心的力量,蘇師傅則未必。陰陽讖諱之事或許無科學理性之憑據,但當一旦整個社會都相信其為真的話,就有撼動現實的力量。無神論者口中雖稱無神,聽到落地獄的詛咒,依然難免心裡有鬼。

所以,蘇師傅果句「咁都禁」,又未免太看輕自己畢生所學了。風水玄學,隨時是刀口上的生意,蘇師傅又唔知算唔算得到呢?

談玄

經常有三姑六婆問我,喂,你都讀唔少書,做乜咁鍾意算命卜卦?最好笑係十六歲果年買左本《李天命的思考藝術》番屋企,居然比信耶教既家人問我做乜買埋尐算命書,笑到我幾乎碌地。咁多年來,硬係要有人響我面前大講一番科學偉論,又或者成功係靠自己努力之類既黃毅力式金句,我真係啋佢地都有味。第一類就係讀緊書既學生哥,佢地覺得自己讀過吓Phy Chem Bi好威威,最鍾意同你講算命卜卦唔科學 ― 喂我幾時講過玄學係科學?第二類就係一尐所謂人生好成功或者自以為人生好成功既「過來人」,喂我都得點解你唔得?你毅力唔夠囉!

其實呢個話題自有人類以來都不斷討論緊,堅係講到好悶。通常對呢班人既質問,我首先都會問︰喂,咁你有無炒開股票?通常話有,有尐話間中。咁我又再問︰你炒股睇唔睇成交、平均線、技術分析?又通常都話有。咁我再問︰咁你覺得呢堆分析又科唔科學?係咪跟住黎買就贏錢?一時時啦。實情呢堆甚麼甚麼分析同玄學一樣,藝術多過科學,你老哥咪一樣睇住佢做乜乜三角形,乜乜保歷加通道黎買?聽者無言。

我又好奇怪何解我既人生中會遇到咁多人叉輪廚我呢方面既興趣,但係另一方面蘇民峰麥玲玲又咁紅既?始終大家口裡說不,身體卻很誠實既。比錢擇日擇吉時改名睇命卜卦睇風水通通其門如巿,邊個唔想知自己條命會點?雖然現實係大家都係幫李生打工既卒仔。

呢個世界大部份人都係凡人,人生地位高低富貴貧賤,多數做番幾年野大概係點都心裡有數,當然梗有例外。果尐好似黃毅力咁既成功者或自詡成功者,梗會覺得喂我今時今日有咁既地位係靠自己得番黎,佢地無非都係想其他人認同自己既付出,呢種心理大家都明既。但係各位香港人,你地大都見證住香港由盛入衰既過程,應該都會諗起「如果,命運能選擇」……呢句歌詞啦。

玄學者,玄也,玄之又玄,眾妙之門。通常初學玩占卜都會偶有奇驗,我諗係beginner’s luck既緣故。越玩越沉迷,但就容易越黎越唔準,因為無左最初既集中力同赤子之心,心情越黎越躁動不安,越發執著於準定唔準。於是又會買書睇跟師父,結果十年八載越學越迷惘者大有人在。此路不通又見另一種術數幾好玩,又或者呀邊個邊個話好準,於是又如是者不停地loop,由八字到紫微斗數到占星,由梅花易數到大六壬。

以我自己黎講,其實咁多種術數講既野都幾一致。消除每種術數中偶有偏差的雜訊,取其最大公約數,成個命譜既輪廓就出左黎。其餘用黎擇日擇時搵工追女等等,時有奇驗。李天命我塞係床底好多年了,反而得閒時都會拎本命理書出黎揭吓。唔期望做咩風水大師術數大師搵大錢,知道自己局限係邊,保持心境平靜,減少妄念,遠離嗔癡,凡事睇開尐,儘力而為,足矣。